: হেৰা আজি দিনটো বহুত ঘূৰা-ফিৰা খোৱা-বোৱা হ'ল ন'? ৰাতিলৈ চিমপুল কিবা এটা বনাবা হা, পেটটো গেৰেউ গেঠেউ লাগি আছে।
: ও ময়ো ক'ম বুলিয়েই ভাবিছিলো। বহুত ভাগৰ লাগিছে জানা। খিছিৰিকে বঢ়াই দিওঁ ন' অকণমাণ?
: এ মজ্জা। বঢ়িয়া হ'ব।
: মোৰো কাম কমিব, খানাটোও লঘু হ'ব।
: শুনা শুনা , খিছিৰিটো নহয় সৰহকৈ পিয়াজ দি বনাবা বুজিছা, মগু নিদিবা, মছুৰ দালি বেছিকৈ দি বনাবা। ডাঙৰ ডাঙৰ কৈ ফুলকবি, গাজৰ, আলু কাটি দিবা হা। আৰু ওপৰত গৰু ঘিঁউ ঢালি....আস!
: হ'ব দিয়া, চিমপুল খাবা বোলে...
: আৰে তাকেইতো। শুনা না, লগত বেচন লেটিয়াই মচমচিয়া বেঙেনা ফ্ৰাই কৰিবা দেই, আফুগুটি দি যে মায়ে কৰে। আৰু সৰু আলু গুটি আছে নহয়? ভাজি দিবা। তেল অকণ বেছি দি যে..
: কিন্তু...
: নহয় শুনা না, নহ'লে নিমিলিব নহয় খানাটো.... জমিব লাগিব না....
: হয় হয়....আৰু কিবা?
: নাই, হৈ যাব। অ' ইয়েছ বিলাহী টক। টকটো মাষ্ট, এণ্ড পাপৰ সেকি দিবা। একদম মিলি যাব। আৰু কাঁহীৰ কিনাৰত এটা এটা গোটা ডিম বইল কৰি যে ৰঙচুৱাকে ভাঁজে। সেইটো হ'লে আৰু একো নালাগে।
: হে প্ৰভু, ইমানবোৰ আইটেম...
: কতনো বেছি, মা থকা হ'লে লাব্রাখনো বনাই দিলে হয়, পিছে তোমাৰ ভাগৰ লাগিছেতো, নবনালেও হ'ব দিয়া।
: কিহৰ ভাগৰ আৰু, যিখনহে লিষ্ট গাইছা। আজিযে সৰস্বতী পূজা পাতিছা ঘৰত মোক ক'বতো লাগিছিল।
: হেই খং কিয় কৰিছা? খিছিৰিহে। পুতুককে হৈয়েই যাব দেখোন। আমাৰ মায়ে চোন..
: হ'ব হ'ব, এতিয়া সেই "আমাৰ মা" পুৰাণ থোৱা। কেতিয়াবা নিজে ৰান্ধি পাইছা নে কিবা এটা?
: নাৰান্ধিলে কি হ'ব, তোমাক খানাৰ আইডিয়া, মেনু চব মজুত কৰি হেল্প কৰি দিওঁতো।
: হেল্প নহয়, ফৰ্মাইছ দিয়া। এতিয়া পাকঘৰ আহা, মোক পাচলি কাটি দিয়া।
: এহ... মোৰ বৰ ভাগৰ লাগিছে অ, তুমি লাহে ধীৰে বহাই দিয়ানা, আজিতো চিমপুল খানাচোন, অকলেই পাৰিবা, নহয় জানো?
: হুম। নোৱাৰিলে হ'ব নে?
: ক'ত যোৱা? শুনা..
: যাওঁ, তোমাৰ ভোজ ৰান্ধোঁগৈ।
: অ, তাৰ আগতে আদা দি ভালকৈ চাহ একাপ দি যাবানে? ইমান ভাগৰ লাগিছে...
: প্ৰভু ইচ্চৰহে বুলিলোঁ। কিয় যে আজি ওলাই গৈছিলোঁ!
✍ © ৰূপালীম (বেংগালুৰু)
২৫.০৫.২০২০
xxxxxxxxxxxxxx
No comments:
Post a Comment